Tempeleers goon veur duobaon

Tempeleers goon veur duobaon

De zoektocht naar een nieuwe President Tempeleer heeft een verrassend resultaat opgeleverd. Bastiaan Klomp en Wim Lousberg gaan de stadsvastelaovendsvereniging samen leiden.

Lees hier het persbericht in ut Mestreechs:

De zeuktoch nao ‘ne nuie President Tempeleer heet e verrassend rizzeltaot opgelieverd. Bastiaan Klomp en Wim Lousberg goon de stadsvastelaovendsvereineging same leie.

“Titel is formaliteit”

Praktisch gezeen kump ‘t drop neer tot Klomp President Tempeleer weurt en Lousberg Vicepresident. Bastiaan Klomp: ”Wim en iech höbbe same um taofel gezete en oonderein gesproke euver wie veer de touwkoms vaan de Tempeleers en de Mestreechter Vastelaovend in ‘t algemein veur us zien. Alletwie wèlle v’r de sjouwers dao oonder zètte en v’r goon ‘t daan ouch ech same doen. D’n titel President of Vicepresident is veur us vaan oondergesjik belaank, dat is veur de formaliteit.” Wim Lousberg völt aon: ”V’r höbbe alletwie eus sterke kante en kinne us op väöl vlaker aonvölle en completere. Dus ech es ein operere. ‘t Allerveurnaomste is tot v’r dat fantastisch cultureel erfgood kinne doorgeve en conservere veur de volgende generaties, mèt de Tempeleers es sterke organiserende partij. Dao höbbe v’r oontzèttend väöl vertrouwe en zin in.”

Proces

De Tempeleers sjreve zoe e jaor geleie de vakkatuur veur president oet, umtot de maximale statutair zittingstermijn vaan twie kier veer jaor veur Henk de Jong es President Tempeleer aofleep. De vereineging stèlde ‘n zeukcommissie aon en sjakelde de hölp vaan Gerald Janssen (Human Resources specialist) in. Janssen heet ‘t proces begeleid. Gerald Janssen: ” ‘t bleek nog gans get. De Tempeleers is ‘n groete vereineging mèt behuurleke oetdaginge de koumende jaore. V’r höbbe gezeuk via de bij de Tempeleers aongeslote gremia wie de “Sósjeteit veur Medaaljes en Sjariteit” en de “Aajd Stadsprinse Sósjeteit”. Ouch höbbe v’r wijer breid in ‘t Mestreechs (vereinegings)leve geloerd nao meugeleke kandidaote. Vaanoet de leie vaan de Tempeleers höb iech, same mèt de zeukcommissie, de opdrach mètgekrege um te zeuke nao ‘nen echte leier, joonk vaan geis, meh mèt väöl ervaring, kinnis vaan ‘t vereinegingsleve in Mestreech en e groet- en good zakelek- en polletiek netwerk. De geprizzenteerde hiere höbbe dat allemaol. Umtot v’r mer ein vakkatuur hadde, heet de zittende Vicepresident Henri Janssen aongebooje um zien positie, in ‘t belaank vaan de vereineging, ter besjikking te stèlle um alletwie de hiere aon te kinne stèlle”.

Achtergroond nui presidium

Zoewel Klomp es Lousberg zien gein oonbekinde veur de Tempeleers. Klomp moch in 2016 es Stadsprins de Mestreechter Vastelaovend veurgoon. In ‘t daogeleks leve is heer directeur/ gashier vaan ‘t Kruushierehotèl. Lousberg is sinds 2017 aon de vereineging verboonde als lid vaan de Tempeleers. In ‘t daogeleks leve is Lousberg directeur vaan ‘t Shared Service Center Zuid-Limburg, ‘t samewèrkingsverband vaan de gemeinte Heerle, Mestreech en Sittard-Geleen. Al weure de twie hiere tijdens de Openbaar Jaorvergadering vaan vriedag 16 november 2018 pas officieel geïnstalleerd, ze leie de vereineging per direk.

Logo 1Limburg