Vastelaovesvinyl met Henk Hover bie Dolcino in Echt

Echt-Susteren

Vastelaovesvinyl bie Dolcino

Missjiens höbs se ze nog op diene zölder , of dae van diene opa of oma of vader of moder ligke; Vinyl plate. LP’s , singles of van die bakkeliete 78 toere plate.

Plate drejje is weer hip. Hie en dao kómme weer platewinkelkes wo ze nuuj of twieëdjehans vinyl verkoupe. Inne joare ’90 , wie de CD opkoom, deje väöl luuj hun vinylplate weg. CD’s klónke baeter, dus woróm zoewe weer die krakendje plate nog langer beware. Op vandaag höbbe weer Spotify en iTunes oppe computer of de tillefoon, en alle meziek vanne ganse waereldj is dao-op te vènje. Meintj men.

Henk Hover, jao dae van L1 en dae van Averegs koom d’r achter det det dus neet zoa is. Zeker neet es ’t äöver Limburgs(talig)e plaetjes geit. Die zeen bliekbaar gaaroets neet de meutje waerd óm te digitalisere.Daoróm ging hae ein paar jaor truuk Limburgstalig vinyl verzamele. Dök zeen ’t plaatselijke hits die in zien collectie zitte, en dök ouch leedjes die boete ’t eige dörp geine kèntj. Num noe es väörbeeldj oos eige stedje Ech. Pioniers es Jan Wolters ( Ja-Wo Records) zatte ein eige label op en brachte daomit plaatselijke successe es ‘Léve de carnaval’ en ‘ ’t Brandjpunt Café’ en ‘Woos doe mit gebore bös’ , ‘Ech ze zègge’ en ‘Oh oh ober’oet. Dé vastelaovesschlager van Pej ‘Pej mien Pej (Pej Pej Alaaf)’ versjeen destieds op ein gezamelijke LP van de Fanfaar van Pejen St. Rochus. Op Spotify en iTunes vuns se die leedjes neet truuk.

De verzameling van Hover besluit inmiddels hónderde singles en LP’s en ’t zoe jaomer zeen óm dao niks mit te doon. Bie ein tas kóffie bie Dolcino óntstóng t idee óm èns eine gans middig langk Vastelaovesmeziek van allein mer vinyl te gaon drejje. Dus allein mer singlekes en LP’s.

Ónger ’t motto:’t zal waal hiej en dao ein bietje krake met ouch bie väöl luuj sjoan herinneringe losmake, kèntj geer op zóndigmiddig 10 fibberwarie kómme loestere.
Hóbs se zelf nog Limburgse plate oppe zölder ligke: Num ze mit en waem wètj, waere ze nog ‘ns opgelag…..

Info

Waar: Bovenstestraat 51, 6101 EH Echt

Wanneer: zondag 10 februari 2019 van 14:11 tot 17:00

Terug naar evenementen