‘Sprookjes bestaon’ - uitreiking Orde van de Gulden Humor 2021 in Weert

Weert

Op vriêdig 26 november en op zaoterdig 27 november teîkentj Stadsvastelaovendjvereîniging De Rogstaekers vör de festiviteite roontelum de uutreiking van de Orde van de Gulden Humor 2021. ’t Beloeëftj ’n groeëts evenemênt te waere volop meziek en spektakel. Vanaaf vandaag zeen de kaarte à € 22,50 per stök te koup via www.guldenhumor2021.nl. Ajje leêver e kaartje inne wînkel kouptj, dan kân det beej Primera Wouters (Oranjeplein 231), Cigo van Bun (Muntpassage 23), The Read Shop Express Weert (St. Jobplein 8), Restaria Jaco (St. Luciastraat 20) en Schoenmakerij Grosveld (Langstraat 54).

De Orde van de Gulden Humor

De Orde van de Gulden Humor wurtj vanaaf 1962 as hoeëgste Limburgse vastelaovendjoongerscheî-jing uutgereiktj doeër de Samewirkende Limburgse Vastelaovesvereniginge (SLV). In 2021 gieët dieës oongerscheî-jing nao acteur Huub Stapel. De SLV hieët tot doelstélling ‘t in stând haoje en bevordere van de vastelaovendj as ‘n uting van laevendje volkscultuur en folklore in Limburg. Vastelaovendj és ‘n belangriêk oongerdael van oeës Limburgs immaterieel êrfgood: lidjes, verhaole, dialecte, rituele, gebroêke en tradities. Stadsvastelaovendjvereîniging De Rogstaekers és aangesloeëte beej de SLV.

Grandioos program

Oonger ‘t thema ‘Sprookjes bestaon’ wurtj Sporthal Bosseve umgetouverdj tot ‘n echt sprookjeskestieël. De Rogstaekers pakke uut mét ‘n sprookjesechtig Vastelaovendjprogramma mét völ Limburgse artieste. Groeëte Limburgse name zoeëwi-j Beppie Kraft, Spik en Span, Bjorn en Mieke, Marleen Rutten, De Toddezèk en Hoondervél laote zich op dieës aovendje van eure beste kânt zeen. Daonaeve és d’r mieër dan genóg aandacht vör muzikaal talênt van Wieërter boeëm. Daobeej ki-jje dînke aan Mark en Wilhelmien, Ronald en Carien, Moerepetazie, Ed en Frans, Patrick Hendrikx, Stefan Wolter, Sanne Huijerjans en nog völ mieër. Alle artieste waere live begelédj doeër ’t Groeët Gulden Humor Promsorkest oonger leî-jing van Tjeu Snoek. ’t Muzikaal program és op allebej de daag ’t zelfdje. De uutreiking van de Orde van de Gulden Humor aan Huub Stapel vingtj allein op zaoterdig plaats. ’n Oeëverzicht van alle artieste és te vînge op www.guldenhumor2021.nl.

Maotregele i.v.m. corona

As ten ti-jje van de Gulden Humor 2021 ten gevolge van corona extra maotregele van kracht zeen, dan zulle vae di-j kinbaar make via de website. Kaartkoupers deêne d’r raekening mej te haoje det aanvöllendje vuuërwaarde doeër de organisatie kunne waere opgelagdj vuuër det uch towgânk tot de Gulden Humor 2021 kân waere gegaeve. Dînktj daobeej bevuuërbieëldj aan ’t laote zeen van ’n coronatowgânksbewiês. Kiektj vör de actueel coronamaotregele op www.guldenhumor2021.nl

Info

Waar: Sporthal Boshoven

Wanneer: vrijdag 26 november 2021 van 19:00 tot 23:59
zaterdag 27 november 2021 van 19:00 tot 23:59

Website: www.guldenhumor2021.nl

Terug naar evenementen