Oetrope Prins Carnaval 2020 Mestreech

Maastricht

Mestreech reup nuie Stadsprins oet

Vaan ‘Groeten Oonbekinde’ nao ‘Zienen Hoegen Hoeglöstegheid’. ‘n Hoegtepunt veur de nuie stadsprins vaan Mestreech, dee al ‘n aontal weke ‘t bèstbewaorde geheim vaan de stad mèt ziech mètdreug. Meh ouch e fies veur ‘t Vastelaovendvierend volk, dat eder jaor weer massaal nao de Merret trèk um te zien wee Mestreech veur geit in de Vastelaovend.

De ‘cortège’ dee de Groeten Oonbekinde nao de Merret zal begeleie, vertrèk zoondag 26 jannewarie um 13.33 oor bij de Statie en trèk via Wiecker Brögkstraot, Aw Maosbrögk, Mestreechter Brögkstraot, Kleine Staat, Groete Staat en Spèlstraot nao de Merret. ‘t Thema vaan ‘t oetrope is dit jaor ’t zaat hermenieke. De Tempeleers zalle es ‘n groete zate hermenie de nuie stadsprins nao zien oetroopmomint begeleie. De Groeten Oonbekinde steit es ‘veendeldreger vaan zate hermenie de Bezuiverde Tröt’ op de wage.

‘t Oetrope weurt dit jaor, in samewèrking mèt Centrummanagement Mestreech en de kaffees Local en De Zwaan aon de Merret, aongekleid mèt mie meziek, extra beertaps en mie sfeer, zoetot ‘t nog mie e ‘benkelek momint’ weurt. Dat beteikent tot DJ Marvin vaanaof 13.30 oor Vastelaovendsmeziek euver de Merret zal laote klinke. Ouch nao ‘t oetrope, tot zoe roond 15.15 oor plaotsvint, drejt Marvin meziek.

Info

Waar: Maastricht Markt

Wanneer: zondag 26 januari 2020 van 13:30 tot 17:00

Terug naar evenementen