Äöpeningsmiddig Genhouter carnaval

Beek

Zóndig 11 november organisere veer weer ózze jaorlikse Äöpeningsmiddig dat v’r dit jaor in ’n nuuj jeske höbbe gesjtoake.



Op ’t programma sjtaon namelik ‘nne heerlikke rwaod-gael-greune Sjravelbrunch en ’t Sjravelkienen dat geer al kint van de jaore dat de Jeugdcommissie dit organiseerde. Good nuuts: zie gaon auch dit jaor weer ’n fjaeske d’rvan maake.



Om 10.30 oer is de ganse Sjravelaire-familie mit in ós midde Prins Eric I en Jeugdprinses Lindsay I in ós sjwoan kirk veur de Heilige Mis. Aansjleetend zölle v’r ózze Sjravelair nao ziene heerlikke zomersjloap tot laeve bringe woomit v’r aangaeve dat ‘t Genhouter carnavalssezoen weer begonne is.



Vanaaf 11.30 oer is jekerein van harte welkom veur ‘nne heerlikke rwoad-gael-greune Sjravelbrunch euver mjerdere gange mit ’n teske koffie of thee.



Uiteraard is ’t reservere van ein of meerdere plaetskes neudig zodat veer weite wieveul brunches v’r moage verzörge. Reserveer daorum ’n plaats (a € 11 veur ‘nne volwassene en € 5,50 veur kinger jonger dan 11 jaor) door ‘nne e-mail nao smeets.ron74@gmail.com of doog ’n tillefonisch besjtilling via 046-4362269.



Nao de Sjravelbrunch is ’t rond 14.00 oer tied veur ’t Sjravelkienen. Dit wurt nog veuraaf gegange door inkele optraejes, ’t onthulle van ’t nuuje decor en natuurlik ’t veursjtille van ós lede van de Road van 11. Bie dees optraejes sjtaon onger angere ós eige Sjravelsjterkes in ’t middelpunt van de belangsjtilling. Dizze enthousiaste groep van ruum 10 kinger is nao de zomervakantie gans opnuuj begosj onger leiding van ’n echte showdanscoach.



’t Sjravelkienen is net wie anger jaore weer ludiek. Desalniettemin sjtoan d’r toch geweldige pries op ’t sjpel, dus ’t is zeker de meujte waerd om ’n röndje mit te sjpele. Vanaaf 13.00 oer kint g’r euch kienkaarte kaupe bie de entree veur € 5 per serie. Wilt g’r alvas ’n serie reservere, laot dat dan auch effe weite via de hieboave geneumde contactgegaeves.



Aan ’t einde van ós programma veur dizze Äöpeningsmiddig gaon v’r ózze nuuje Schlager veur ’t iërst heure en nog ’n paar polonaises renne.

Info

Waar: Tref. Oos Dörp Genhout

Wanneer: zondag 11 november 2018 van 10:30 tot 17:00

Terug naar evenementen